ابتعد عن الكلام اللي بدون دليل في سوق العقار
صدقني، سوق العقار في الإمارات ممتلئ بالشائعات وكل يوم في قصه يديده يوم بيقولون لك “السوق بيطير والأسعار بتغلى”، ويوم ثاني تسمع “خلك صابر، الأسعار بتنزل” الطبيعي إن هالكلام يخليك تحس بضغط وتهرّب او تشتري بسرعه خوفاً من تضيع الفرصه.
بس الصراحه، اغلب هالشائعات ما لها اي اساس حقيقي او موثوق
في ناس يحبون يلمعون الكلام عشان يبيعون عقاراتهم اسرع، وفيه اللي يحبون بس يسولفون عشان يحسّون إنهم فاهمين السوق، وانت لو تأثرت بهالكلام بدون ما تتحقق، على الأغلب بتطيح في موقف صعب او تخسر فلوسك.
الحل؟ خلك دوم على المصادر الموثوقه
شوف تقارير رسميه عن السوق، تابع مواقع الأخبار العقاريه الكبيره، واستشير وسطاء عندهم سمعه طيبه وتجربه حقيقيه، هالخطوه تعطيك صوره واضحه عن السوق وتخليك تاخذ قراراتك بعقلانيه، مب على اساس إشاعه او كلام فلان.
وصدقني، احياناً أفضل شيء تسويه هو الصبر والمراقبه، خلي عينك على المشروع او المنطقه اللي حاب تستثمر فيها، شوف اتجاه الأسعار على طول الوقت، وخلك على تواصل ويا ناس فاهمه السوق، شوي شوي راح تتعلم تحدد الفرق بين الكلام الفاضي والحقائق.
في النهايه، الأستثمار الناجح ما يقوم على الإشاعات ولا الخوف من ضياع الفرص يقوم على المعرفه، التخطيط، والمعلومات الصحيحه. كل خطوه محسوبه اليوم، تعطيك راحة وطمأنينة بكرة. وصدقني، هالهدوء والعقلانية بالاستثمار أفضل بكثير من الاندفاع والخساره.
==========
روضة الجنيبي، شابة إماراتية تسهم في صياغة محتوى عقاري بلهجة محلية، ضمن مبادرة أطلقتها يسار أبو حجلة، الوسيطة العقارية والمدربة من مواليد أبوظبي 1976، بالتعاون مع فريق RE/MAX Smart Concept وشابات إماراتيات لعرض السوق العقاري بروح وطنية أصيلة
